32.9
An Coinníoll Iata
Deirtear gur coinníoll iata atá sa chéadbheart má léiríonn an clásal amhras an
chainteora faoi chomhlíonadh an choinníll nó a chinnteacht faoi
neamhfhéidearthacht a chomhlíonta nó go bhfuil a fhios aige nár comhlíonadh é.
Dá an cónasc i gcéadbheart dearfach mura nó dá ... gan i gcéadbheart diúltach.
Ní athraítear foirm an bhriathair de réir am an ghníomhaithe murab ionann is an
gnás i mórán teangacha Eorpacha eile.
- dá dtéadh (rachadh) Liam ann inné (anois, amárach)
gheobhadh sé an leabhar
- mura dtéadh (rachadh) Liam ann inné (anois, amárach)
ní bhfaigheadh sé an leabhar
- dá mbeadh sé gan chiall
ní choimeádfaí sa bhanc é.
Sa chéad abairt thuas cuireann an cainteoir in iúl go gceapann sé nach
ndeachaigh, nó nach dócha go ndeachaigh Liam ann inné nó go gceapann sé nach
rachaidh nó nach dócha go rachaidh Liam ann anois nó amárach.
Sa dara habairt cuireann sé in iúl go gceapann sé go ndeachaigh, nó gur dócha go
ndeachaigh Liam ann inné nó go gceapann sé go rachaidh, nó gur dócha go rachaidh
Liam ann anois nó amárach.